Теориядан – нақты кейстерге

Болашақ көлік мамандары мен логистер көлік саласы мен логистика бағытындағы өзекті тақырыптар бойынша зерттеулері мен тәжірибелік жобаларын таныстырды. «Көлік, көлік техникасы және технологиялары» білім беру бағдарламасының студенттері «Автомобильдерді диагностикадан өткізу және қызмет көрсетудің заманауи құралдарын қолдану технологиясы» пәні бойынша жобаларын қорғады. «Тасымалдауды ұйымдастыру, қозғалыс және көлікті пайдалану» білім беру бағдарламасының студенттері «Жүк және коммерциялық жұмысты басқару» пәні бойынша жүк станциясының жұмысын зерттеп, жүк және вагон ағындарын талдады. Сонымен қатар, оның жұмысын экономикалық және тәжірибелік тұрғыдан жетілдірудің тиімді жолдарын ұсынды. «Логистика» білім беру бағдарламасының студенттері «Қойма логистикасы» пәні аясында тұрақты логистика қағидаттарына негізделген «жасыл қоймаларды» енгізу жүйесі тақырыбында жоба ұсынды. Жоба барысында қалдықсыз өндіріс пен тұйық цикл қағидаттарына негізделген экологиялық жауапты бизнес жүргізу тәсілдері қарастырылды. Зерттеу Қостанай қаласындағы компаниялардың логистикалық қызметіне, сондай-ақ қаптама материалдары мен қалдықтарды басқару үдерістеріне арналды. Жобаның тәжірибелік базасы ретінде «ZAKAZAUTO GROUP» ЖШС таңдалды. Жобаларды қорғауға қатысқан оқытушылар студенттердің жұмыстарын жоғары бағалап, олардың жобаларының әрі қарай дамуына тілектестік білдірді.

19 мамыр 2026 жыл.