Сарбазға хат

Ұлы Жеңістің 80 жылдығы мен Отан қорғаушы күніне орай Міржақып Дулатов атындағы

  Қостанай инженерлік-экономикалық университетінің студенттері сарбаздарға хат  арнап, жүрек түбінен шыққан алғыс пен тағзымдарын қағаз бетіне түсірді. Бұл хаттар — бейбіт өмір мен көк аспан үшін жанын қиған Отан қорғаушыларға деген шексіз құрметтің, елге, жерге деген махаббаттың айғағы.

 Студенттер хаттарының әр жолында — өткеннің үні, жүректегі сағыныш пен риясыз ризашылық бар. Бұл — соғыстың салмағын көрмеген буынның ерлікке бас иіп, ертеңі үшін күрескен ата-бабаларға деген адал ықыласы. Олар қағаз бетіне  сезім мен сенімді, жауынгер рухына деген тағзым мен шексіз алғыстарын  сыйдырған.

 Бүгінгі бейбіт күн — сол боздақтардың қанымен келген қасиетті мұра. Ал студенттердің хаттары — сол мұраның ұмытылмай, жүректе мәңгі сақталуының бір көрінісі. Бұл — тарихпен тілдесу, үнсіз жатқан ерлікпен сырласу, болашақтың аманаты.