Студенттік Арбат: түлектер болашағын таңдады

Қостанай қаласының орталығы бір күнге нағыз студенттік кеңістікке айналды: музыка, тақырыптық стендтер, еркін қарым-қатынас және облыстың түкпір-түкпірінен келген жоғары сынып оқушылары. Мұның бәрі — «Студенттік Арбат» атты кәсіби бағдар көрмесі. Түлектер колледж және жоғары оқу орындарының өкілдеріне жақындап, буклеттер жинап, сұрақтар қойып, студенттік атмосфераны сезініп қайтты. Әрқайсысының сұрағы әртүрлі болғанымен, бәрінің іздегені бір — мектептен кейін кім боламын? М. Дулатов атындағы Қостанай инженерлік-экономикалық университеті мен ҚИнЭУ кәсіпкерлік колледжінің алаңы жоғары қызығушылық тудырды. Баннерлер, ашық әрі мейірімді студенттер (олардың арасында «Жақсылық бумерангы» еріктілер ұйымының мүшелері де болды), оқытушылар мен қызметкерлер – бәрі де келушілермен ашық әңгіме жүргізіп, оқу бағдарламалары жайлы бөлісуге дайын болды. Біреулер инженерлік мамандықтарға қызықса, енді біреулер кәсіпкерлік колледж жайлы көбірек білгісі келді. Алаңға тек оқушылар ғана емес, ата-аналар, тіпті әжелер де келіп, қызығушылықпен тыңдап, сұрақтар қойып жатты. Университет пен колледж өкілдерімен бетпе-бет тілдесу – ешкім жібергісі келмейтін мүмкіндік болды. Көрмені «Жастар рухы» жастар қанаты Жұмысшы мамандықтар жылы аясында ұйымдастырды. Іс-шара қарапайым кәсіби бағдар көрмесі емес, әр оқушы өзін студенттік ортаның бір бөлігі ретінде сезіне алатын шынайы интерактивті алаңға айналды.