ҚИнЭУ-дегі Open Day

Бүгін Қостанай инженерлік-экономикалық университеті Қостанай қаласының мектеп оқушылары үшін өз есігін айқара ашты. Open Day аясында қаламыздағы 15-тен астам мектептің жоғары сынып оқушылары университеттің тыныс-тіршілігімен, профессор-оқытушылар құрамымен және білім беру бағдарламаларымен жақын танысу мүмкіндігіне ие болды. Қабылдау комиссиясының жауапты хатшысы Жеңісгүл Мұратқызы Жұмаш университеттің мүмкіндіктері, ғылыми және инновациялық әлеуеті, оқуға түсу шарттары, сондай-ақ студенттік өмір мен қалыптасқан дәстүрлер туралы кең көлемді презентация ұсынды. Презентациядан кейін қатысушылар оқу зертханаларын аралап, заманауи материалдық-техникалық базамен өз көздерімен танысты. . Оқушылар университеттің білім беру ортасына еніп, даярлық бағыттары туралы толық мағлұмат алды. Оқушылардың айтуы бойынша, заманауи оқу зертханалары оларға ерекше әсер қалдырды. «Бүгін біз ҚИнЭУ-ді ішінен көрдік. Жабдықталған зертханаларын көрдік, бірегей білім беру бағдарламалары бар екенін білдік. Болашақта осы университетке түскім келеді», - деп бөлісті ойларымен мектеп оқушылары. Машина жасау, энергетика және IT бағыттары бойынша "Инженериядағы алғашқы қадамдар" воркшопын Қостанай инженерлік-экономикалық университетімен консорциум шеңберінде Қостанай қаласы әкімдігі білім бөлімінің ақпараттандыру және білім сапасын бағалау әдістемелік орталығы ұйымдастырды.

18 желтоқсан 2025 жыл.