Сианьдағы студенттік жаз!

Сианьдағы студенттік жаз!

Қостанай инженерлік-экономикалық университетінің екі студенті Қытайдың көне әрі заманауи шаһарларының бірі - Сиань қаласында өтіп жатқан халықаралық жастар спорттық-мәдени лагеріне қатысуда.

4-10 маусым аралығында ұйымдастырылған «Youth Sports & Cultural Exchange Camp» жазғы лагері әлемнің түкпір-түкпірінен келген студенттерді бір алаңға тоғыстырып, спорт, білім және мәдениет арқылы халықаралық ынтымақтастықты нығайтуды мақсат етеді.

Лагерь бағдарламасы мазмұнды іс-шараларға толы. Қатысушылар Батыс Қытайдың ғылым және технологиялар инновациялық портын аралап, Сиань қаласының жетекші жоғары оқу орындарымен танысады. Сондай-ақ қысқы және су спорт түрлеріне арналған жаттығу базаларында болып, Қытай халқының дәстүрлі спорт түрлері мен мәдени мұрасын жақыннан тануға мүмкіндік алады.

Айдаһар қайықтары жарысының тарихы мен ерекшеліктері, ұлттық өнер мен спорт элементтері де бағдарлама аясында кеңінен таныстырылады.

Айта кету керек, лагерьді Қытайдың ең беделді жоғары оқу орындарының бірі саналатын Сиань Цзяотун университетінің дене шынықтыру және спорт институты ұйымдастыруда.

Мұндай халықаралық жобалар студенттердің дүниетанымын кеңейтіп қана қоймай, түрлі елдердің жастары арасында достық байланыстар орнатуға және әртүрлі мәдениеттерді жақынырақ тануға жол ашады.

ҚИнЭУ студенттері үшін бұл сапар - халықаралық тәжірибе жинақтап, университеттің абыройын әлемдік деңгейде танытудың тағы бір мүмкіндігі.

4 маусым 2026 жыл