Кәсіптік бағдар: кәсіби маманды қалыптастыру жолы

Бүгін білім беру қызметкерлерінің тамыз конференциясы аясында Қостанай инженерлік-экономикалық университетінде аудандық және қалалық білім бөлімдерінің әдіскерлері, тәрбие ісі жөніндегі директор орынбасарлары, кәсіби бағдар бағытына жетекшілік ететін мамандардың қатысуымен секция отырысы өтті. Отырыстың тақырыбы: «Кәсіби бағдар әдіскері: адал азамат пен кәсіби маманды қалыптастырудағы теориядан тәжірибесіне дейін». Іс-шара орны ретінде ҚИнЭУ-дің таңдалуы кездейсоқ емес. Университет кәсіби бағдар беру бағытында белсенді жұмыс атқарып келеді. Бұл жұмыс Қостанай облысы Білім басқармасы, ҚИнЭУ, «Kamlit Kz» ЖШС және «Аllur» компаниясы арасында жасалған ынтымақтастық туралы меморандум аясында мектеп оқушыларына ерте кезеңнен кәсіби бағдар беру бағытында ауқымды бірлескен жұмыстар атқарылуда. ҚИнЭУ ректоры Арман Исмаилов құттықтау сөз сөйлеп, мамандықты саналы түрде таңдаудың маңыздылығына және бұл үдерістегі университеттің рөліне тоқталды: -Кәсіби бағдарлау – бұл бір реттік емес, жүйелі әрі үздіксіз жүргізілетін жұмыс. Жастарға нақты ақпарат беру арқылы олардың өз мүмкіндіктерін дұрыс бағалап, болашақта табысты маман болуына жағдай жасауымыз керек, – деді университет басшысы. «Инженерияға алғашқы қадамдар» консорциумы аясындағы кәсіби бағдар жұмысының негізгі бағыттары» тақырыбында ҚИнЭУ қабылдау комиссиясының басшысы Жеңісгүл Жұмаш мазмұнды баяндама жасады. Ол консорциум аясында жүзеге асырылып жатқан жобалар мен оқушыларға инженерлік мамандықтарды таныстыруда қолданылып жүрген тиімді әдістерге тоқталды. Отырыс барысында қатысушылар кәсіби бағдар жұмысының өзекті мәселелерін талқылап, табысты тәжірибелерімен бөлісті, болашаққа жоспарлар жасады. Іс-шара соңында университет бойынша экскурсия ұйымдастырылып, қонақтарға заманауи зертханалар мен техникалық жағынан жабдықталған оқу аудиториялары көрсетілді.