Жасыл бастама

Бүгін Қостанай инженерлік-экономикалық университетінің эко-орталығында студенттер, оқытушылар және университет қызметкерлері үшін алғашқы тәжірибелік дәріс өтті.

Дәріске қатысқан қонақтардың бірі - Андрей Зелевский, әлеуметтік кәсіпкер. Ол пластик қалдықтарын зағип жандарға арналған тактильді төсемелерге айналдырып, қоршаған ортаны қорғауға өз үлесін қосып келеді. Оның жобасы - қарапайым қалдықтан қоғамға пайдалы өнім жасауға болатынын дәлелдейтін мысал.

Ал әлеуметтік кәсіпкер, экобелсенді Динара Шадрина өз сөзінде экологияны тұтынушылық тұрғыдан қарастырудың маңыздылығына тоқталды.

«Экология - біздің өмір салтымызбен тікелей байланысты. Күнделікті әдеттеріміз - бір пластикалық бөтелке, үйге тапсырыс арқылы алынған тамақ - мұның барлығы қоқыс ізін қалыптастырып, табиғатқа кері әсер етеді. Біз осыны түсінген сәттен бастап өзгеріс басталады», - деді ол.

Болашақта ҚИнЭУ базасында тұрақты түрде жұмыс істейтін эко-орталық - бұл тек жоба емес, практикалық білім беру алаңы болмақ. Мұнда студенттер қалдықтарды сұрыптау, қайта өңдеу, экологиялық өнімдер жасау және экотехнологияларды меңгеру бағытында тәжірибе жинақтайды.

Эко-орталықтың қызметі арқылы теория мен тәжірибе тоғысып, студенттерге экологиялық ойлау мен жауапкершілік мәдениетін қалыптастыру көзделуде.

12 қараша 2025 жыл