80 жас - Ұстаздың мерейлі белесі

Бүкіл ғұмырын ғылым мен білім жолына арнаған, бірнеше буын шәкірттің жүрегіне ұстаздық мейірімін ұялатқан, елге еңбегі сіңген физик-математик, ұлағатты ғалым, энергетика және машина жасау кафедрасының профессоры Жеңіс-Нұры Мырзатайұлы Кужекеев 80-жылдық мерейтойын атап өтуде. Оның өнегелі өмір жолы мен адал қызметі, білімге деген сүйіспеншілігі - баршамызға үлгі. Ол білім мен ғылымды дамытуға жарты ғасырдан астам өмірін арнады. Әр жылдары Арқалық педагогикалық, Қостанай педагогикалық, Рудный индустриалды институттарында, Қостанай өңірдік университетінде еңбек етіп, түрлі кафедраларды басқарды, жаңа бағыттар ашты, талай жас маманды тәрбиеледі. Бүгінде ел игілігі үшін қызмет етіп жүрген көптеген инженерлер, физиктер мен педагогтар оны зор мақтанышпен өздерінің ұстазы деп атайды. 17 жылдан бұрын Жеңіс-Нұры Мырзатайұлы өз тағдырын М.Дулатов атындағы Қостанай инженерлік-экономикалық университетімен байланыстырып, оқу ордамызда кафедра меңгерушісі де, проректор қызметін атқарды, қазір де көптеген әріптестері мен студенттеріне- бағыт берер парасатты тұлға. Жеңіс-Нұры Мырзатайұлы ешқашан ұстаздық жолдан ауытқыған емес. Тіпті туған күнінде де студенттерімен бірге мұз айдынына шығып сырғанап, жан жастығының жасқа қарамайтынын тағы бір мәрте дәлелдеді. Шын ғалымға тән құштарлық, өмірге деген сүйіспеншілік оның бойынан әрдайым сезіледі. Бүгін ҚИнЭУ ұжымы қадірлі профессорды құттықтап, ақжарма тілектерін білдірді. Университет президенті Рихсибай Абдурахманович Мамедов мерейтой иесінің иығына шапан жауып, ғылым мен білімге сіңірген зор еңбегіне деген ерекше құрметін жеткізді. Туған күніңіз құтты болсын, Жеңіс-Нұры Мырзатайұлы! Мерейлі 80 жасыңыз құт-берекеге толы болғай!

25 қараша 2025 жыл