KEnEU International Week 2025 екінші күні: AgroKaz жобасының нәтижелері мен жетістіктері

Міржақып Дулатовтың 140-жылдығына арналған KEnEU International Week 2025 халықаралық апталығының екінші күні AGROKAZ жобасы тобының жұмысынан басталды. Жиында Erasmus+ ұлттық офисінің Қазақстандағы үйлестірушісі Лаура Палуанова, Нови-Сад университетінің профессоры, PhD докторы, AGROKAZ жобасының үйлестірушісі Татьяна Бранков , Қазақ ұлттық аграрлық-зерттеу университетінің талдау және стратегия департаментінің директоры, профессор, PhD докторы Марина Алексеева, Ж. Жиембаев атындағы өсімдіктерді қорғау және карантин ғылыми-зерттеу институтының басқарма төрағасының орынбасары Әлібек Оспанов, Торайғыров университетінің Виктор Камкин құттықтау сөз сөйледі. ҚИнЭУ академиялық даму жөніндегі проректоры Жұлдыз Орынтайқызы Ошақбаева жобаның серіктестер арасында үздік тәжірибелерді алмасуға мүмкіндік бергенін атап өтті. Ол жобаның үйлестірушілеріне, серіктес университеттер мен жұмыс берушілерге атқарған еңбектері үшін алғыс білдірді. Нови-Сад университетінің профессоры Татьяна Бранков AGROKAZ жобасына қатысу олардың университеті үшін тек академиялық ынтымақтастық емес, өзара түсіністік пен мәдени байланысқа құрылған үлкен тарихи сәт екенін жеткізді. Ол Қазақстанның әрдайым жылы құшақ жая қарсы алғанын, қонақжайлығы мен шынайылығы ерекше әсер қалдырғанын айтты. Бірге жұмыс істеу кәсіби серіктестікті ғана емес, өзара құрмет пен ел мәдениетін терең түсінуді қалыптастырғанын жеткізді. Іс-шара барысында профессор Татьяна Бранков «Идеядан іске асыруға дейін: Қазақстанда агроэкология саласында дуалды білім беру бағдарламасын құру» атты баяндамасын ұсынды. Сондай-ақ Торайғыров университеті, Қазақ ұлттық аграрлық-зерттеу университеті және ҚИнЭУ бағдарламаны әзірлеу мен енгізу тәжірибесімен бөлісіп, жетістіктерін таныстырды. Ал шетелден келген қонақ - Йосип Юрай Штросмайер атындағы университетінің профессоры Тихана Сударич еуропалық сапа стандарттарымен, әдістемелерімен және тәжірибелерімен бөлісті. Жалпы, баяндамашылар AGROKAZ жобасының Қазақстандағы аграрлық білім беруді жаңғыртудағы ерекше маңызын атап өтті. Жоба жаңа форматтағы агроном мамандарын даярлауға, халықаралық серіктестікті нығайтуға, тәжірибеге бағытталған оқытуды күшейтуге және агроэкология саласындағы заманауи құзыреттіліктерді қалыптастыруға мүмкіндік береді.

25 қараша 2025 жыл

м