Дуальды білім берудегі жұмыс берушілердің рөлі

KEnEU International Week 2025 халықаралық апталығы аясында дуальды білім берудің дамуына жұмыс берушілер мен ауыл шаруашылығы кәсіпорындарының рөлі тақырыбында панельдік пікірталасы өтті. «Заречное» ауыл шаруашылығы тәжірибе станциясының ғылыми хатшысы, қауымдастырылған профессор Сания Әбілтайқызы Тулькубаева Қостанай инженерлік-экономикалық университетінің «Агроэкология» білім беру бағдарламасы студенттеріне арналған тәлімгерлік тәжірибе жөнінде баяндама жасады. Оның айтуынша, ауылшарушылық станцияның AGROKAZ жобасының серіктесі ретінде таңдалуы кездейсоқ емес. Себебі станция тәжірибелі ғылыми кадрларға, заманауи материалдық-техникалық базаға, ғылыми зерттеулерге арналған алдыңғы қатарлы құрал-жабдыққа ие. Қазіргі уақытта студенттер станция базасында тәжірибелік сабақтар өтуде. Алдағы уақытта да олар агрохимия, топырақ пен өсімдік үлгілерін талдау, минералдық тыңайтқыштардың құрамын зерттеу сияқты пәндер бойынша практикалық жұмыстарын жалғастырады. Панельдік талқылауға сондай-ақ «Жас қанат-2006» ЖШС бас директоры, Қазақстан Құс өсірушілер одағының төрағасы Қайрат Әлембайұлы Маишев, Әулиекөл ауыл шаруашылығы колледжінің директоры Альмира Бағытқызы Жансугурова, «BESTkz» білім және туризм орталығының директоры Гульмира Амангелдіқызы Капенова катысты. Альмира Жансугурова дуальды оқыту техникалық және кәсіптік білім беру жүйесіндегі ең өзекті бағыттардың бірі екенін атап өтті. Қайрат Маишев болса өз сөзінде: «Кадрлық саясат, сапалы білім мен дуальды оқыту- мемлекет, бизнес, білім беру және ғылым арасындағы маңызды көпір», - деп атап өтті. Панельдік талқылаумен қатар Демокрит атындағы Фракия университетінің профессоры, PhD докторы Спиридон Кутрубас ҚИнЭУ студенттері мен оқытушыларына «Азотты тиімді пайдалану - тұрақты өсімдік шаруашылығының кілті» тақырыбында дәріс оқыды. Ол өз университетіндегі ғылыми тәжірибелер мен азоттың тиімділігіне бағытталған әдістерді таныстырды.

25 қараша 2025 жыл