Жаңа жылдық ғажайып

Бүгін ҚИнЭУ-де нағыз жаңа жылдық ғажайып орын алды. Университеттің қызметкерлері мен оқытушылары күнделікті қызметтік рөлдерін бір сәтке ұмытып, әрқайсысы өз мінезі мен тарихы бар жаңа жылдық ертегі кейіпкерлеріне айналды. Университетте «Үздік жаңа жылдық костюм» байқауы алғаш рет ұйымдастырылды. Соған қарамастан, қатысушылар саны аз болған жоқ. Байқауға тыңғылықты дайындық жүргізілді: костюмдер, реквизит, музыка мен шығармашылық нөмірлер - барлығы ұсақ-түйегіне дейін ойластырылған. Сахнада жапон қызы, түлкі, Мысық Базилио мен Түлкі Алиса, шырша, Эльза, арнайы жасақ сарбаздары, сүйкімді қара мысықтар және, әрине, Ақшақарлар шықты. Алайда қатысушылар тек костюмдерін көрсетумен шектелмеді. Әр образ шығармашылық тұрғыда қорғалды: әндер мен өлеңдер оқылды, жылы лебіздер айтылды, би нөмірлері қойылды. Байқауға қатысушыларды қолдауға тұтас ұжымдар келді. Көрермендер өз фавориттеріне белсенді түрде жанкүйер болып, қатысушылармен суретке түсіп, мерекелік көңіл күйге бөленді. Жаңа жылдық түрлену шарасының бастамашысы маркетинг және коммуникациялар бөлімі. Дәл осы ұжымның идеясы мен ұйымдастыруының арқасында ҚИнЭУ бүгін күлкіге, жылулыққа және нағыз жаңа жылдық ғажайыптың атмосферасына бөленді. Мерекелік іс-шара демеушілердің, соның ішінде ҚИнЭУ басшылығының қолдауымен өтті. Олар қатысушыларға жағымды тосынсыйлар дайындады: @moon_spa_kst @bereke_home.kst @vitaminchik.kostanay @kosmetika_kost_nedorogo_ @merey_nail_kst @soblazn_belye_kst @parfum_lux_kostanay

Байқау жеңімпаздарының есімдері ертең өтетін жаңа жылдық концертте белгілі болады.

24 желтоқсан 2025 жыл.