Экоорталықтағы экосабақ

Бүгін КИнЭУ экоорталығында №17 жалпы білім беретін мектептің оқушылары қонақта болды. Танымдық экскурсия барысында олар «Жасыл алаңның» миссиясымен және жұмыс қағидаларымен танысты. Экоорталық халықаралық «AGROKAZ» жобасы аясында ашылған және «Нөл қалдық» философиясы негізінде жұмыс істейді. Экскурсия жетекшісі, экоорталық басшысы Динара Шадрина орталықтың барлық аймақтарын таныстырып, олардың ерекшеліктерін егжей-тегжейлі түсіндірді. Аймақтар «нөл қалдық» қағидаларына сәйкес сағат тіліне қарсы бағытта орналасқан. Бұл - адамның ескі тұтынушылық әдеттеріне қарсы тұруын білдіретін символикалық шешім. -Экология тек аумақты тазалау немесе ағаш отырғызумен шектелмейді. Біз артық тұтыну дәуірінде өмір сүріп жатырмыз және күнделікті әдеттеріміз арқылы қоршаған ортаға айтарлықтай әсер етеміз. Теріс үдерісті азайту үшін арнайы қағидалар қалыптасқан. Біздің экоорталық сол ережелерге негізделген, – деді Динара Шадрина. Университеттің республикалық «Restart» жобасына қатысатынын білетін оқушылар экскурсияға құр қол келмей, өздерімен бірге пластик бөтелкелерді де ала келген. Экскурсия соңында қатысушылар күн сайын қаншалықты көп қалдық шығаратынымызды түсініп, табиғатты қорғаудың маңыздылығын тағы бір мәрте сезінді.

11 ақпан 2026 жыл