Кәсіпкерлік жоба қалай пайда болады және дамиды?

Бүгін Қостанай инженерлік-экономикалық университетінде «Идеядан бизнеске: кәсіпкерлік жоба қалай пайда болады және дамиды» тақырыбындағы шеберлік сабағы өтті. Іс-шараны Мансап және бизнес көшбасшылық орталығы ұйымдастырды. Кездесудің спикері - Қостанай облысы Кәсіпкерлер палатасы Іскер әйелдер кеңесінің төрайымы, «Ақ ерке» жекеменшік балабақшалар желісінің негізін қалаушы әрі басшысы Елена Владимировна Венгерская болды. Шеберлік сабағы барысында студенттер өз идеяларын жан-жақты дамытты: «идеялар ағашын» жасап, топтарға бөлініп, ойын форматында бизнес-жобалар әзірледі. Әр қатысушы өз рөлін атқарды: «Мән-мағынаны анықтаушы» туындаған мәселені бизнес тіліне аударса, «қорғаушы» тұтынушының қажеттіліктеріне назар аударды, «тестер» тәжірибелік қадамдарды ұсынды, ал спикер жобаны қорғады. Тапсырмалар, тосын сұрақтар мен қызу талқылаулар аудиторияға ерекше серпін берді. Қысқа уақыт ішінде студенттер өнімнің кімге арналғанын, оның артықшылығы неде екенін және оны кімге сату керектігін анықтай алды. Нәтижесінде, қатысушылар берілген тапсырманы сәтті орындап шықты. Студенттер бұл шеберлік сабағынан алған әсерлерімен бөлісті. Бұл кездесу олар үшін жай ғана сабақ емес, идеядан нақты бизнеске бастар алғашқы қадам болды.

17 наурыз 2026 жыл.