Машина жасау саласының даму болашағын талқылады

Бүгін энергетика және машина жасау кафедрасының апталығы аясында Қостанай облысының жаңа кәсіптер мен құзыреттер атласы шеңберінде машина жасау саласының даму перспективаларына арналған дөңгелек үстел өтті. Талқылауға Қостанай облысы кәсіпкерлер палатасының салалық даму және инвестициялық жобаларды сүйемелдеу бөлімінің басшысы Роберт Ринатович Юсупов, сондай-ақ негізгі стейкхолдерлер – «KIA Qazaqstan», «МТЗ-Қазақстан» машина жасау зауыты, «Қостанай агромеханикалық зауыты»AGRAL FARM», «Астық» элеватор жабдықтары зауыты ЖШС-тері, Allur корпоративтік университеті өкілдері қатысты. Бүгінде машина жасау саласы жай ғана жаңару кезеңін емес, жаһандық индустриялық трендтермен шартталған терең технологиялық трансформацияны бастан өткеруде. Бұл - цифрлық өндірістік модельдерге көшу, автоматтандыру және интеллектуалды басқару жүйелерін енгізу. Мұндай өзгерістер өндіріс құрылымына да, кадрлық әлеуетке қойылатын талаптарға да тікелей әсер етеді. Сондықтан дөңгелек үстелде саланың ағымдағы мәселелерімен қатар, оның ұзақ мерзімді даму бағыттары да талқыланды. Атап айтқанда, өңір экономикасын қалыптастыратын машина жасаудың негізгі сегменттері, болашақта сұранысқа ие болатын құзыреттер және білім беру жүйесінің осы өзгерістерге бейімделу жолдары қарастырылды. Роберт Ринатович Юсуповтың айтуынша, машина жасау секторы бүгінде өңірлік жалпы өнімнің елеулі үлесін қалыптастырып отыр және алдағы уақытта оның экономикалық маңызы арта түседі. Қостанай облысының жаңа кәсіптер атласын әзірлеу – осы өзгерістерге берілген жүйелі жауап. Бұл құжат білім беру мен өндіріс арасындағы өзара байланысты нығайтып, білім беру бағдарламаларын жаңартуға, практикалық даярлықты күшейтуге және жастар үшін жаңа мансаптық бағыттарды қалыптастыруға мүмкіндік береді. Сарапшылар атап өткен негізгі технологиялық бағыттардың қатарында өндірісті цифрландыру және роботтандыру, аддитивті технологияларды дамыту, композиттік материалдарды қолдану бар. Сонымен қатар, саланың «жасыл» трансформациясына - энергия тұтынуды азайту мен экологиялық жүктемені төмендетуге ерекше назар аударылды. Бизнес өкілдері білім беру ұйымдарымен ынтымақтастықты күшейтуге дайын екендіктерін білдірді. Кәсіпорындар студенттерді тәжірибеден өткізіп, оларды нақты өндірістік үдерістерге тартуға және оқу барысында практикалық дағдыларды қалыптастыруға мүдделі. Кездесу қорытындысы бойынша қатысушылар Қостанай облысының машина жасау саласы құрылымдық қайта жаңғыру кезеңінде деген ортақ пікірге келді. Саланың болашағы цифрландырумен, технологиялық жаңарумен және жаңа буын мамандарын даярлаумен тығыз байланысты.

18 наурыз 2026 жыл.