Стандарттар = қауіпсіздік

Бүгін ҚИнЭУ стандарттау және тағам технологиялары кафедрасының студенттері DoDo Pizza компаниясының қонақ дәрісіне қатысты. «Стандарттар - бәсекелестік артықшылық» тақырыбындағы дәрісті аймақтық басқарушы Анна Шакина өткізді.

Кездесу барысында студенттерге: «Егер тағамның қалай дайындалғанын білмесеңіз, оны жейсіз бе?» деген сұрақ қойылды. Жауап нәтижесі көрсеткендей, көпшілік үшін тағамның дайындалу процесін, сақтау мерзімін және санитарлық талаптардың сақталуын білу аса маңызды.

- Тамақ өнеркәсібінде стандарттар – бұл қауіпсіздік, - деп атап өтті Анна Шакина.

Спикер компанияның қалыптасу тарихына тоқталып, жылдар бойы құрылған жүйе туралы баяндады. DoDo Pizza қатаң стандарттар негізінде жұмыс істейді екен: біртұтас рецепттер, бірізді қызмет көрсету талаптары және сапаны тұрақты бақылау.

Сонымен қатар, Анна Шакина басқару жүйесінің ашықтығына ерекше назар аударды. Компания асханаларында орнатылған онлайн-камералар арқылы кез келген клиент тапсырыстың дайындалу процесін бақылай алады. Сондай-ақ студенттер қатыса алатын жаңа амбассадорлық бағдарлама туралы да айтылды.

Аталған дәріс болашақ технолог мамандар үшін келесі аптада басталатын оқу практикасы алдында маңызды дайындық болды.

 Іс-шара университет пен жұмыс берушілер арасындағы ынтымақтастық аясында ұйымдастырылып, студенттердің практикалық дағдыларын дамытуға бағытталды.

9 сәуір 2026 жыл