Аудан түлектерімен жүздесті

Қостанай инженерлік-экономикалық университетінің кәсіби бағдар беру тобы облыс мектептерімен кездесулерін жалғастыруда. Өткен аптада олар Бейімбет Майлин ауданы әкімдігінің ішкі саясат бөлімінің Жастар ресурстық орталығы мен білім беру бөлімі ұйымдастырған «Ашық есік күні» ауқымды іс-шарасына қатысты.

ҚИнЭУ қабылдау комиссиясының жауапты хатшысы Жеңісгүл Мұратқызы Жұмаш жоғары сынып оқушыларына университеттің білім беру бағдарламалары, оқу бағыттары, қабылдау ережелері және студенттерге ұсынылатын мүмкіндіктер туралы жан-жақты ақпарат берді.

Кездесу барысында оқушылар университеттің түрлі жобалары мен даму мүмкіндіктерімен, студенттік өмірмен танысып қана қоймай, қызықтырған сұрақтарын қойып, нақты әрі пайдалы жауаптар алды.

Қостанай инженерлік-экономикалық университеті өз болашақ студенттерін күтеді. Мүмкін, дәл осы оқушылардың арасында ертең үлкен университет ұжымының бір бөлігі болатын жастар бар шығар.

24 сәуір 2026 жыл