Инженерияға алғашқы қадамдар

Бүгін біздің университет Қостанай ауданынан келген мектеп оқышыларын қарсы алды. Бұл аз да, көп те емес - 19 мектеп: Тобыл қаласы, Майқөл, Айсары, Жамбыл, Александровка, Ждановка, Владимировка, Заречный, Озерный, Мичурин, Октябрьское және тағы басқалар.

Жоғары сынып оқышыларын қабылдау комиссиясы қарсы алып, қызықты сұрақ-жауап айдарын өткізді. Онда қатысушыларға белгілі бір тіркестер арқылы кафедраның атауын табу тапсырылды. Халықаралық ынтымақтастық және жобаларды енгізу орталығы академиялық ұтқырлық бағдарламасының мүмкіндіктері мен университетіміздің халықаралық серіктестері туралы ақпарат берді.

Қабылдау комиссиясының жауапты хатшысы Жеңісгүл Жұмаш оқушыларды білім беру бағдарламаларымен таныстырып, оқудың артықшылықтары мен даму перспективалары туралы әңгімеледі.

Кейін оқушылар заманауи зертханаларымызды аралап, кафедралар ұйымдастырған қызықты ойындарға қатысты және болашақ мамандығын таңдауда көмектесетін көптеген пайдалы ақпарат алды.

«Инженерияға алғашқы қадамдар» атты воркшоп машина жасау, энергетика және IT бағыттары бойынша өтті. Іс-шараны әдістемелік орталық пен білім сапасын бағалау бөлімі университетімізбен консорциум аясында ұйымдастырды.

Қостанай ауданының оқушылары - сіздер өте ізденімпаз әрі белсенді екенсіздер! Осындай студенттер бізге керек. Келесі кездескенше! 

13 қараша 2025 жыл