Үлкен команданың бөлшегісіздер

Қостанай инженерлік-экономикалық университетінің Студенттік Ассамблеясы ресми түрде жұмысын бастады. Кеше студенттік бастамаларды қолдауға бағытталған бұл ұйымның құрылғанын растайтын куәлікті Қазақстан халқы Ассамблеясы төрағасының орынбасары Марат Алмасұлы Әзілханов өзі табыстады. Студенттік Ассамблеяның төрағасы - ақпараттық технологиялар және автоматика кафедрасының 2-курс студенті Мадинабону Набиева. - Қандай жоспарыңыз бар? - деп сұрады Марат Алмасұлы. -Біз бірге, бірлікте жұмыс істеп, көптеген іс-шараларға қатысып жүрміз. Тілдер күніне орай Қазақстан халқы Ассамблеясының кабинетінде дөңгелек үстелдер өткіздік, Міржақып Дулатұлының 140-жылдығына арналған іс-шараларға белсенді қатыстық,. Бұл - біздің алғашқы қадамдарымыз, - деп жауап берді Мадинабону. Марат Алмасұлы Әзілханов студенттерге сәттілік тіледі: – Сіздер әртүрлі отбасында өстіңіздер, әртүрлі қала мен ауылдан келдіңіздер, әрқайсыңыздың оқыған мектебіңіз, арман-мақсатыңыз бөлек болды. Егер сіздер осы жерде достасуды үйренсеңіздер, онда бүкіл ел бойынша да татулық пен бірлікті сақтай аласыздар. Сіздер - Қазақстан халқы Ассамблеясы деп аталатын үлкен команданың бір бөлшегісіздер. Алдарыңызда үлкен мүмкіндіктер тұр.

10 желтоқсан 2025 жыл.