Қаржылық сауаттылығын тексерді

Бүгін қаржылық қауіпсіздік бойынша ұлттық олимпиаданың алғашқы кезеңі басталды. М.Дулатов атындағы Қостанай инженерлік-экономикалық университетінің студенттері де бұл білім бәйгесінде бақтарын сынады. Сынақ алдында әлеуметтік-экономикалық пәндер кафедрасының аға оқытуышысы Надежда Ивановна Росенко қатысушыларға сәттілік тілеп, асықпай, әр сұрақты мұқият оқуға кеңес берді. Бұл маңызды сөздер студенттердің көңілін бір серпілтіп тастады. Олимпиада тапсырмалары жеңіл емес: барлығы 50 сұрақ, ойлануға шамамен екі сағат уақыт берілді. Сұрақтар қаржылық пирамидалардың белгілерінен бастап, қазіргі заманғы ұғымдар - мысалы, кастодиалдық әмияндарға дейін қамтыды. Яғни тек теорияны білу жеткіліксіз, бүгінгі қаржы әлеміндегі үрдістерді де түсіну қажет. Іс-шараны Қазақстан Республикасының Қаржылық мониторинг агенттігі Халықаралық желілік институтпен бірлесіп ұйымдастырған. Негізгі мақсат - жастардың қаржылық сауаттылығын арттырып қана қоймай, оларды қаржылық қауіп-қатерлерді тануға және оларға қарсы тұруға үйрету. Алда тағы екі кезең бар. Үздік нәтижеге қол жеткізгендер Қазақстан намысын Ресейде өтетін олимпиадада қорғайды.

2 сәуір 2026 жыл.