Заман өзгерсе - заң да өзгереді

Бүгін Қостанай инженерлік-экономикалық университетінің студенттеріне Ахмет Байтұрсынұлы атындағы Қостанай өңірлік университетінің әлеуметтік-гуманитарлық ғылымдар факультетінің деканы, тарих ғылымдарының кандидат Әлібек Нұрмағамбетұлы Табулденов дәріс оқыды. Ол еліміздің негізгі заңының қалай қабылданғаны және мемлекеттік биліктің жаңа архитектурасы туралы баяндады. -Тарихқа көз жүгіртсек, еліміздің құқықтық негіздері тереңде жатыр. Мысалы, «Қасым ханның қасқа жолы» мен Тәуке хан «Жеті жарғысы» өз заманында қоғам өмірін реттеп отырды. Жаңа Ата заң – сол тарихи дәстүрдің жалғасы, - деп атап өтті спикер өз сөзінде. Жаңартылған Конституцияның мазмұны адамға бағдарланған сипатқа ие. Ол қазіргі қоғамдық құндылықтарды және саяси институттардың тиімділігін арттыруға бағытталған мемлекеттік қағидаттарды қамтиды. Құжаттың басты ерекшелігі - адам құқықтарына басымдық берілуі. - Оқытушы әрі азамат ретінде мен үшін ең маңызды мәселе - жаңа Конституция аясында білім мен ғылымның дамуы, - деп атап өтті спикер. - Олар тұрақты дамуды және ұлттық қауіпсіздікті қамтамасыз ететін стратегиялық бағыт ретінде бекітілген. Сондай-ақ, Әлібек Нұрмағамбетұлы бұл өзгерістердің ел болашағы үшін маңызды екенін атап өтті.

21 сәуір 2026 жыл.