«Esirtkisiz Bolashaq» форумы: жаңа меморандум

Бүгін Қостанайда «Esirtkisiz Bolashaq» форумы өтті. Іс-шара «Есірткісіз Қазақстан» жобасы аясында Қостанай облысы Полиция департаментінің Есірткі қылмысына қарсы іс-қимыл басқармасы және Қостанай облысы әкімдігі Қоғамдық даму басқармасының қолдауымен ұйымдастырылды. Форум жұмысына М. Дулатов атындағы Қостанай инженерлік-экономикалық университеті де қатысты. Іс-шара барысында біздің университет пен «Есірткісіз болашақ» қоғамдық қоры (Esbol Qory) арасында өзара ынтымақтастық туралы меморандумға қол қойылды. Тараптар өңір тұрғындары арасында есірткі заттарының таралу қаупін азайтуға бағытталған ынтымақтастықты нығайту мен дамытуға келісті. Сонымен қатар, азаматтық, қоғамдық және IT жобаларды бірлесіп жүзеге асыру, оның ішінде қор ұсынатын бағдарламалық шешімдерді профилактикалық жұмыстарға енгізу көзделді. Меморандум аясында бірлескен іс-шаралар, кездесулер мен кеңестер ұйымдастыру жоспарланған.

13 мамыр 2026 жыл.