Жол қозғалысы: студенттерге ескерту

Қостанай қаласының Полиция басқармасы патрульдік полиция батальонының аға лейтенанты Серікжан Тауекелұлы Жонқабаев бүгін студенттерге жол қозғалысының жаңа ережелерін түсіндірді.

Оның айтуынша, 25 тамыздан бастап электрсамокаттарды пайдалану тәртібіне қатысты жаңа талаптар күшіне енді.
- Электрсамокатпен тротуарда сағатына 6 шақырымнан жоғары жылдамдықпен жүрген жағдайда, ӘҚБтК-нің 615-бабы бойынша жауапкершілік қарастырылған. Айыппұл мөлшері - 3 АЕК, - деді Серікжан Тауекелұлы.

Жаңа талаптарға сәйкес, электрсамокаттар велосипед жүретін жолмен немесе велосипед жолағымен жүруі тиіс. Олар болмаған жағдайда жолдың оң жақ шетімен немесе жол жиегімен жүруге рұқсат етіледі. Алайда жолдың жүріс бөлігіне шығу үшін жүргізуші куәлігі, қорғаныш дулығасы және жарық шағылыстыратын кеудеше болуы қажет.

Кездесу барысында полиция қызметкері студенттерге дрондарды пайдалануға қатысты шектеулер туралы да айтып, қауіпсіздік талаптарын сақтаудың маңыздылығын атап өтті.

8 қыркүйек 2026 жыл