Конституция - ел тірегі

 Бүгін М. Дулатов атындағы Қостанай инженерлік-экономикалық университетінде Қазақстан Республикасы Мемлекеттік қызмет істері агенттігінің Қостанай облысы бойынша департаменті Сыбайлас жемқорлыққа қарсы іс-қимыл басқармасының маманы Бағдат Агибаевич Капышев студенттермен кездесті.

Кездесу барысында департамент өкілі адалдық, парасаттылық және жеке жауапкершілік мәселелеріне тоқталды. Сонымен қатар 2026 жылғы 1 шілдеде күшіне енген Қазақстан Республикасының жаңа Конституциясының маңызын түсіндірді.

Адалдық пен парасаттылық Конституцияда бекітілген «Заң және Тәртіп» қағидатымен тығыз байланысты. Конституцияның 36-бабына сәйкес әрбір адам Қазақстан Республикасының Конституциясы мен заңнамасын сақтауға, басқа адамдардың құқықтарын, бостандықтарын, ар-намысы мен қадір-қасиетін құрметтеуге міндетті.

Адал болу - заңды сақтау, өз міндетіне жауапкершілікпен қарау, өзгенің құқығын құрметтеу және сыбайлас жемқорлықтың кез келген көрінісіне төзбеушілік таныту. Әділетті Қазақстанды қалыптастыру әр азаматтың осындай саналы таңдауынан басталады.

21 қазан 2026 жыл