Еуразияшылдық және Қазақстанның дамуы

 Бүгін әлеуметтік-экономикалық пәндер кафедрасының әдістемелік апталығы аясында «Ғылым тарихы мен философиясы» пәні бойынша «Еуразияшылдық және Қазақстанның дамуы» тақырыбында ашық бинарлық сабақ өтті. Екі оқытушының диалогынан құрылған сабақ университетте алғаш рет ұйымдастырылды. Сабақты философия ғылымдарының кандидаты, Қостанай инженерлік-экономикалық университетінің қауымдастырылған профессоры Райхана Қазиханқызы Абдрахманова және арнайы шақырылған қонақ, философия ғылымдарының кандидаты, Ахмет Байтұрсынұлы атындағы Қостанай өңірлік университетінің қауымдастырылған профессоры Айгүл Бақытжанқызы Амантаева жүргізді. Сабақ барысында еуразияшылдық – қазіргі қоғамдық, мәдени және геосаяси ойдың маңызды бағыттарының бірі ретінде жан-жақты талқыланды. - Еуразияшылдық бізге өркениет ретінде кім екенімізді, тарихымыздың, мәдени тамырларымыздың қандай екенін, сондай-ақ Еуразия мемлекеттерінің, соның ішінде Қазақстанның қазіргі әлемдегі орнын түсінуге көмектеседі. Қазақстан Еуразия кеңістігінің дәл ортасында орналасқандықтан, интеграциялық үдерістердегі рөлін асыра бағалау мүмкін емес, – деді Райхана Қазиханқызы. Айгүл Бақытжанқызы өз сөзінде мәдениетаралық диалогқа тоқталып, қазақстандық модельдің қоғамның тарихи тәжірибесінің нәтижесі екенін атап өтті: «Қазіргі заманның түрлі сын-қатерлеріне қарамастан, республика жаңаша тәсілдерді енгізіп, көпэтносты қоғамда тепе-теңдікті сақтап, бейімделе алатынын көрсетіп келеді», – деп қорытындылады ол. Қос университеттің студенттері мен магистранттары еуразияшылдықтың тарихи-философиялық бастаулары жайлы өз көзқарастарын ортаға салды. Олар еуразияшылдық идеяларының негізі Қазақстан тарихымен, түркі өркениетімен және мәдени өзара ықпалдастықтармен тығыз байланысты екенін атап өтті. Сабақтың мақсаты — еуразияшылдықтың мәнін философиялық әрі мәдени-тарихи бағыт ретінде ашу, оның Қазақстанның қазіргі интеграциялық және ұлттық стратегияларына ықпалын көрсету еді. Қатысушылар ғылыми көзқарастардың кең ауқымымен, ғылыми мектептермен және еуразияшылдықтың философиялық ағымдарымен танысып, тақырыпты жан-жақты меңгерді.

10 желтоқсан 2025 жыл.