Мектеп пен университетті біріктірген меморандум

Бүгін М.Дулатов атындағы Қостанай инженерлік-экономикалық университеті мен Рудный қаласы білім беру бөлімінің М.Дулатұлы атындағы жалпы білім беретін мектебі «Серіктестік алаңы» желілік өзара іс-қимыл мен ынтымақтастық жобасы аясында меморандумға қол қойды. Аталған меморандум жоғары және орта білім беру ұйымдары арасындағы серіктестікті нығайтуға, кәсіби бағдар беру жұмысын кеңейтуге және оқушылардың болашақ мамандығын саналы таңдауына жағдай жасауға бағытталған. Кездесу барысында университет ректоры Арман Оразалиұлы Исмаилов оқу орынның дайындық бағыттары, білім беру бағдарламалары және заманауи материалдық-техникалық базасы туралы кеңінен баяндады. Сондай-ақ ұстаздар үшін де қолжетімді «Білім берудегі менеджмент» магистратура бағдарламасына түсу мүмкіндіктері таныстырылды. Жоспарда - кәсіби бағдар беру дәрістері мен шеберлік сыныптары, университетке экскурсиялар, олимпиадалар, ашық есік күндері, сондай-ақ оқушылардың ғылыми-зерттеу және жобалық жұмыстарға қатысуы бар. Сондай-ақ мектеп мұғалімдері мен университет оқытушылары арасында тәжірибе алмасу және бірлескен білім беру бағдарламаларын іске асыру да меморандумның маңызды бағыты болып табылады. Жақын арада М. Дулатұлы атындағы жалпы білім беретін мектептің оқушылары алғаш рет университетімізге келіп, оқу ордамен жақынырақ танысатын болады.

20 қаңтар 2026 жыл